महाराष्ट्राचे परिवहन मंत्री तसेच धाराशिव जिल्ह्याचे पालकमंत्री मा. श्री प्रताप सरनाईक यांनी पवनचक्की प्रकल्पांसाठी होणाऱ्या जमीन संपादन प्रक्रियेत शेतकऱ्यांची फसवणूक करणाऱ्या दलालांवर कठोर कारवाई करण्याचे आदेश जिल्हा प्रशासनाला दिले आहेत. ग्रामीण भागातून प्राप्त झालेल्या अनेक तक्रारींची दखल घेत त्यांनी स्पष्ट निर्देश दिले की, कोणताही दलाल शेतकऱ्यांवर दबाव,धमकावणे किंवा अन्य अनुचित मार्गांचा अवलंब करून त्यांच्या योग्य मोबदल्यात अडथळा आणता कामा नये.
मंत्रालयात आयोजित करण्यात आलेल्या आढावा बैठकीत जिल्ह्यातील वरिष्ठ अधिकारी,पोलीस प्रतिनिधी,पवन ऊर्जा कंपन्यांचे प्रतिनिधी तसेच शेतकरी संघटनांचे प्रतिनिधी उपस्थित होते. या बैठकीत मा.श्री सरनाईक यांनी संपूर्ण प्रक्रिया सुरक्षित, पारदर्शक आणि विश्वासार्ह असणे आवश्यक असल्याचे अधोरेखित केले. शेतकऱ्यांच्या हितांचे संरक्षण करण्यासाठी औपचारिक तक्रार नसली तरीही पोलीस प्रशासनाने स्वतःहून कारवाई करावी व जमीन संपादन प्रक्रियेत पूर्ण जबाबदारी निश्चित करावी, असे निर्देश त्यांनी दिले.
मा. श्री सरनाईक यांनी सांगितले की धाराशिव जिल्ह्यात पवन ऊर्जा क्षेत्रात विकासाच्या मोठ्या संधी उपलब्ध असून खऱ्या गुंतवणूकदारांना प्रशासनाकडून पूर्ण सहकार्य दिले जाईल. मात्र, शेतकऱ्यांचे हित आणि न्याय यांच्याशी कोणत्याही परिस्थितीत तडजोड केली जाणार नाही, हे त्यांनी स्पष्ट केले.
तसेच, दिवाळीच्या कालावधीत एसटी महामंडळाने (एमएसआरटीसी) उल्लेखनीय उत्पन्न नोंदवले असून, ही यशस्वी कामगिरी सुधारित सेवा व्यवस्था आणि राज्यभरातील कर्मचाऱ्यांच्या समर्पित प्रयत्नांचे फलित असल्याचेही त्यांनी नमूद केले.
